Ek umeed thi… aaj nahi toh kal,
samay badal jaayega, sab theek ho jaayega.
Par shayad na waqt badla, na insaan.
Jab chhoti thi, lagta tha — maa-baap samjhenge,
par tab woh nahi samjhe.
Jab badi hui, laga — koi toh hoga jo mujhe samjhega,
par kismat ko bhi yeh manzoor nahi tha.
Pyaar sach mein tha, aisa laga…
par shayad woh sab ek dhoka hi tha.
aur in sab ke beech khud ko kahin kho diya.
Woh sapne jo kabhi dekhe the,
pata nahi kahaan kho gaye.
Sabko khush karte-karte,
khud kahaan gum ho gaye…
Kis se umeed rakhu?
Bolta hai — hume nahi bataogi toh kaise samjhenge?
Par kabhi time deke samjha hai?
Kabhi mehsoos kiya hai zarurat ke waqt ka dard?
Ek ladki agar apna samajh kar sabka khayal rakhe, ghar sambhale, kaam kare — toh sab kehte hain, ‘yeh toh uska farz hai.’
Par jab wahi ladki ek shabd boldi, toh log kehte hain — ghamandi hai, jhagadalu hai, isme toh feelings hi nahi hain.
Sabko woh samjhe, sabki baat maane —
Par use koi samjhe, yeh umeed karna galat kyun hai?
Ek ladki ghar mein utni hi akeli hoti hai,
jitna woh dikhati nahi hai.
Apne saare gham muskurahat ke peeche chhupa deti hai,
taaki koi uska dard na pehchaan sake.
Sabko lagta hai — use kya gham hoga,
ghar mein aaram se khana, sona hi toh karti hai...
Par koi nahi jaanta, uske dil mein kitni toofan chhupe hain.
Har din ek muskurahat ke saath shuru hota hai,
taaki duniya samjhe sab kuch theek hai.
Par din dhalte hi, phir wahi tanha raat aati hai,
aur uske saath laut aata hai — uska akelapan.
Har din ek umeed hoti hai — aaj kuch naya hoga,
par sab kuch wahi reh jaata hai.
Is bhagdod bhari zindagi mein kisike paas waqt hi kahaan hai,
kisi ki baat sunne ka, kisi ka dard mehsoos karne ka.
Aaj dil se ek awaaz aayi,
toh socha — ek paana likh du,
taaki mann halka ho jaye.
Shayad kabhi aage jaake,
yeh alfaaz kisi dil se mil jaayein…
aur waqt sach mein badal jaaye.
Comments
Post a Comment